1 Peter 1

Mumušâwe â jambuŋdâŋ

1Petoro no Jesu Kristo ere aposolo jukopaczi Anutu bâwosâecfâc-ticne Ponto â Galatia â Kapadokia â Asia â Bitinia mâreŋko ocŋondeŋ jaba juraŋgopieŋ ŋoŋere papia ši qâreŋkekopac. 2Anutu Mamaczi maname fowecte rowosâec-ŋopawec ŋoŋe hâcne Mârozi maŋfuru bacŋopaocte â mume rereŋfâcne eniŋte Jesu Kristore soc ruambiŋ: Ŋoŋerao aki anonoc â wama fua bâbâriŋ fuahuc fozejec.

Sambaŋ merâfâc-nâŋec šâŋe rarac biaŋ irec šeriezo

3Nâŋâc Anutu, Wofuŋ-nâŋec Jesu Kristo ere Mamac, e muteŋkenšepeneŋ. Eki Jesu Kristo hâmockonec faharewecte uruc jauŋ sâko-ticnere erâ, juju fârire mamanac junaŋte bâɋârec-nâpowec. 4Sambâŋko merâfâc-ŋeŋic šašaŋke tâmiric â bie gufec tâmiric â hâmo qanšaraŋ tâmiric woŋec-ŋeŋic râekicne fokac, i juku rauckeniŋte iŋuc hâcne eŋarewec. 5Ehuc Anutu tâpiri-ticnezi bâwâzâŋ-ŋopame mamanasiŋhec juhapie juku dameŋ tarame bâbâpiaŋ kâdoc bâmockekicne i fua tâcneocmu. 6Ŋoŋe irec šeri ehuc juŋgopieŋ, â Anutuzi muŋareme fific guguriŋ faio ferâ šâic busâqocko juhuc sifu dameŋ bembeŋne macte jamaŋ kirâ jueŋgopieŋ. 7Manaŋgopieŋ, goì i wiac šašaŋkene fuŋne-ticne šocko taniŋkeekac, ŋoŋe ine mamanasiŋ-ŋeŋic, wiac furi sâko jâmbâŋ, irec fârine fific guguriŋko fua taniŋkeme Jesu Kristo fifisi-ticnao ŋoŋere šeri bubiaŋ â mumuteŋ â eri qaraweŋ fuaocmu. 8Ŋoŋe Jesu e hawari-ticne mi honembiŋzi sifu maŋŋeŋic qikiŋnecneeŋgopieŋ, erâ dameŋ šiŋucne wâc šâŋezi mi hohone sifu manasiŋkeeŋgopieŋ. Ehuc šeri bubiaŋ fuŋmoc, ŋicmiczi mi mumufuane, manacneeŋgopieŋ. 9Mamanasiŋ-ŋeŋicte fârine maŋ qâqâtâc-ŋeŋicte bâbâpiaŋ hâcne, maic-ŋopakacte šeri eŋgopieŋ.

Porofete findaŋdâŋ mumbiŋ irec fârine fuawec

10Bâbâpiaŋ i weniŋuc fuazokac, porofete jaŋe mârâc jaha iŋuc wiorâ gufu koparic ehuc jumbiŋ, ehuc ŋoŋerao aki anonoc fuaocte irec findaŋdâŋ muhuc jumbiŋ. 11Kristo e šâic fâro manaku eri tatamac-ticne rorâ juocmu, irec dâŋ Mâro-ticnezi maŋjeŋicko râeme jaŋe dameŋ wezimucko â weniŋucnao Kristo iŋuc fuacnezokac muhuc wawariehuc jumbiŋ. 12Jaŋe gie bambiŋ irec fârine jaŋacnao mâcne, ŋoŋerao fuaocte mukicne, i jaŋe mufua-jarekicne. Eme šâhec irec fârine fuame Tiri Mârozi sambâŋkonec waharâ mitiŋic neŋgoc ŋejareme Biŋebiaŋ muromackembiŋ jaŋe hâcne findaŋdâŋte fârine mujaŋgeŋke-ŋarembiŋ. Dâŋ irec šuhucne aŋelo jaŋe wâc mana šiguaniŋte buââkec jueŋgopieŋ.

Qâpuc hata râpecke sanaŋkezo

13Irec ŋoŋe maŋŋeŋicte umbika jomarâ maŋsowa junšepieŋ, ehuc Jesu Kristo fua tâcnerâ aki anonoc bâfua-ŋareocmu, irec mamanac junšepieŋ. 14Anuture mume rereŋfâc ŋoŋe mârâc jaha qâpuc-ŋeŋicko sasechec jujumbieŋ, ju ju sâc ijaha šiŋuczia mi junšepieŋ. 15Tiri runezi hefârec-ŋopawec ere sâcko tiri jaha jufârenšepieŋ. 16Dâŋ šiŋuc hâcne qâreŋkekicne fokac: “No tiri jukopacte ŋoŋe tiri jaha junšepieŋ.”

Wiac furi sâkozi kitâc-nâpowec

17Ŋoŋe Mamac mucnehuc wâsickeeŋgopieŋ e ra rowec ware rowec mi ehuc juju bapa-nâŋecte sâcko dâŋnâŋec mutaraocmu” irec ŋoŋe mâreŋko jaba juhuc sâc e araŋ bacnehuc junšepieŋ. 18Ŋoŋe šiŋuc sâcne manaeŋgopieŋ, kâcɋenefâc-ŋeŋic jaŋere sindaŋ hata âtehuc juhapie wiac sisirowenezi, goì siliwa wiaczi mi kitâc-ŋopawec. 19Ŋoŋe Kristore soc furi Sâko izi kitâc-ŋopawec. E hâcne lama sahac fâsâc â wânâŋ tâmiric iŋucne juwec. 20E mârâc jaha, mâreŋte hobeteŋne mi fuahame gie i mucnekicne fufua ine šâhec dameŋ tarazo ehame ŋoŋere erâ fuawec. 21Erâ ŋoŋe Anuturao šuhuc-ŋopawec, Anutu hâmockonec bâɋârerâ eri tatamac hec neme huwec erao hâcne” eme irec mamanasiŋ â woworic-ŋeŋic Anuturao fokac.

Mitidâŋzi bâɋârec-nâpowec

22Ŋoŋe dâŋfâri murâ rereŋ ekupie maŋ qâqâtâc-ŋeŋic ɋaɋackewec i ââgo fârihec eniŋte iŋuc fuawec” eme irec maŋzi jâmbâŋ šâšâfic ehuc junšepieŋ 23Ŋoŋe fufua ɋâri i ukic sisirowenaonec mâcne, mi sisirowenaonec, Anuture dâŋ jujune â fofo sanaŋ, irecnec âkešurâ fuambiŋ. 24Dâŋ šiŋuc hâcne fokac:

“Sahachec jaŋe sopâc kecɋaŋ iŋucne,
â šâŋe rarac biaŋ-jeŋic i šariŋ âri iŋucne.
Sopâc kecɋaŋzi ɋaŋaekac â ârinezi mârâŋkeekac.
Anuture dâŋzi ine fofo sanaŋ foocmu.”
 25Biŋedâŋ biaŋne ŋazakicne ši hâcne.
Copyright information for KMG